Trajnim ne aspektin procedurial dhe ne aspektin teknik për punonjësit e policisë, ofruesit e shërbimeve sociale dhe punonjësit e sigurisë në cështjet e krimit kibernetik, parandalimin dhe trajtimin e tij.
IKTD në partneritet me AKCESK, Policinë e Shtetit dhe CVE, dhe me mbështetjen e Ambasadës Hollandeze në Shqipëri, organizoi trajnimet e para në Gjirokastër për oficerët e policisë, punonjësit e shërbimeve sociale dhe policët e sigurisë pranë shkollave, të qarkut të Gjirokastrës.
Trajnimet u zhvilluan mbi rritjen e kapaciteteve në sigurinë kibernetike në aspektin procedurial dhe teknik për çështje si: bullizmi kibernetik, pornografia online me të mitur, ekstremizmi i dhunshëm online, etj.
Trajnimi në aspektin procedurial kishte për qëllim të rriste ndërgjegjësimin dhe të kuptuarin e çështjeve të krimit kibernetik dhe kërcënimeve që ai shfaq, si dhe rëndësinë e ofrimit të shërbimit në mënyrë profesionale në koherencë me mbrojtjen e të drejtave dhe lirive themelore të njeriut.Nëpërmjet këtij trajnimi synohej që pjesëmarrësit të kuptonin sa më shumë reth krimit kibernetik dhe sigurisë kibernetike për të ofruar shërbim cilësor në përgjigje të nevojave të “viktimës”, por edhe për të përmirësuar sigurinë në jetën e tyre personale dhe profesionale.
Trajnimi në aspektin teknik kishte objektiv kryesor dhënien e njohurive TIK bazë mbi krimet kibernetike dhe kërcënimet kibernetike, standardet në fushë, rekomandimet mbi procedurat teknike që duhet të ndjekin dhe përdorimin gjatë punës së tyre, si dhe masa të rekomanduara për parandalimin dhe minimizimin e riskut të krimit dhe kërcënimit kibernetik. Në këtë mënyrë u përmirësuan njohuritë dhe aftësitë e punonjësve të zbatimit të ligjit në këtë fushë të rëndësishme duke i aftësuar në kryerjen e detyrave në mënyrë më profesionale.
Ekspertët gjatë trajnimeve mbajtën një qasje te drejtuar nga respektimi i të drejtave të njeriut, ndjeshmërisë ndaj rasteve viktima të krimit kibernetik pavarësisht gjinisë, identitetit, përkatësisë fetare apo moshës, në të gjithë procesin ligjor të trajtimit të tyre, si dhe trajtuan rëndësinë e sigurisë online.Pjesëmarrësit në këto trajnime ndanë pikëpamjet e tyre në lidhje me çështjet e krimit kibernetik, parandalimin dhe trajtimin e tij.
